3. Lög og reglur

3.7  HVERT STEFNIR Á ÍSLANDI?

Notendastýrðri aðstoð hefur einungis verið beitt í tiltölulega fáum tilvikum hér á landi undanfarin ár. Engu að síður er ljóst að þetta fyrirkomulag hefur sannað gildi sitt og þótt henta vel flestum sem reynt hafa. Af þeim sökum ríkir mikill áhugi á þjónustu af þessu tagi, jafnt meðal hugsanlegra notenda, hagsmunasamtaka fatlaðra, starfsfólks sem annast þjónustu við fatlað fólk sem – í seinni tíð – meðal stjórnmálamanna. Sú þekking og reynsla sem aflað hefur verið á notendastýrði aðstoð á Norðurlöndunum hefur ennfremur verið því fólki hvatning sem lætur sig varða þjónustu við fatlað fólk hér á landi.

Af þeim atburðum sem sett hafa mark sitt á þróunina undanfarið má meðal annars nefna ráðstefnu hagsmunasamtaka fatlaðra og félags- og tryggingamálaráðuneytisins um notendastýrða aðstoð sem haldin var í september 2009 og ræðu félags- og tryggingamálaráðherra á alþjóðadegi fatlaðra 3. desember 2009. Þar lagði hann sérstaka áherslu á að auka svigrúm fyrir notendastýrða aðstoð hérlendis. Á ráðstefnunni í september var Adolf D. Ratzka, forstöðumaður Independent Living Institute í Svíþjóð, meðal fyrirlesara.

Þá ber að nefna að í júníbyrjun 2010 var á Alþingi samþykkt samhljóða þingsályktunartillaga um að félags- og tryggingamálaráðherra leggi fram á komandi haustþingi frumvarp til laga um notendastýrða aðstoð. Það skiptir að sjálfsögðu höfuðmáli að slíkur áhugi og samstaða skuli koma fram á æðstu stöðum í íslenska stjórnkerfinu og á sjálfu Alþingi.

Á árinu 2009 voru ennfremur stofnuð samtök hagsmunaaðila sem hafa það að markmiði að skipuleggja og koma á laggirnar notendastýrðri aðstoð í ríkari mæli og styðja við notendur slíkrar þjónustu. Einnig má nefna starfshóp, sem stofnaður var nýlega og í er einkum fólk frá hagsmunasamtökum fatlaðra, sem hefur það að markmiði að ryðja brautina enn frekar í þessum efnum með kynningu og fræðslu.[1]  Evald Krog frá Muskelsvindfonden í Danmörku hefur verið hópnum innan handar og starfar með honum.