Staðan í dag
Núverandi aðstæður: Foreldrar fatlaðra barna sem búa í dreifðum og fámennum byggðarlögum á Íslandi hafa á undanförnum áratug óskað í ríkari mæli eftir þjónustu í sinni heimabyggð eða sem næst henni. Ljóst er að á landsbyggðinni er ekki alltaf til staðar þekking til að takast á við ný og flókin verkefni sem getur fylgt því að annast um og/eða veita fötluðu börnum þjónustu. Sérfræðingar- og ráðgjafar sem hafa það hlutverk að þjónusta fötluð börn og fjölskyldur þeirra og þá sem veita þeim þjónustu eru í flestum tilfellum staðsettir í þéttbýli oft fjarri notendum og þeirra þjónustuaðilum. Ráðgjöf og stuðningur vill því oft verða stopull og ómarkviss og mætir ekki þörfum þeirra sem á þurfa að halda.
Upplýsingatæknin: Upplýsingatæknin skipað sér æ fastari sess í lífi fólks og er litið er svo á að með henni megi auka lífsgæði fyrir fólks og samfélagshópa. Við lifum í upplýsingasamfélagi þar sem þjónusta, samskipti og upplýsingar eru ráðandi þættir í atvinnulífi jafnt sem einkalífi fólks. Ör þróun er á sviði upplýsingatækninnar (UT), en með hugtakinu er átt við þegar tölvu-, fjarskipta- og rafeindatækni er beitt við gagnavinnslu og hvers kyns samskipti. Möguleikarnir, sem eru óþrjótandi, kalla á réttan hugbúnað og tækjakost en ekki síst þekkingu á sviðinu, aðgang að háhraðaneti og öruggri fjarskiptaþjónustu á viðráðanlegu verði.
Í dag nýtir flest fólk sér möguleika upplýsingatækninnar á einn eða annan hátt og þeir sem ekki hafa aðgang að henni fara á mis við ákveðin lífsgæði sem felast t.d. í aðgangi að ótakmörkuðu magni upplýsinga og hvers kyns þekkingu og þjónustu. Unga fólkið sem hefur alist upp við tölvur og veraldarvefinn er óneitanlega opnara en þeir sem eldri eru fyrir öllum þeim nýjungum sem upplýsingatæknin býður upp á. Það hefur tileinkað sér tæknina og nýtir hana í miklum mæli til samskipta, upplýsinga- og þekkingaröflunar og ekki síst til afþreyingar. Upplýsingatæknin og nýting hennar er og mun verða lykillinn að framþróun, jafnt einstaklinga sem samfélaga.
